पेरण्या खोळंबल्या शेतकर्‍यांसाठी महत्वाची बातमी

जुलै महिन्याचे नऊ दिवस उलटले, तरी कोकण वगळता राज्याच्या बहुतेक जिल्ह्यांमध्ये पर्जन्यमान सरासरीखालीच आहे. राज्यात आतापर्यंत सरासरीपेक्षा २२ टक्के कमी पाऊस झाला असून, मराठवाड्यात सरासरीपेक्षा ३६ टक्के, तर विदर्भात ३२ टक्के कमी पाऊस नोंदला गेला आहे. मोठ्या पावसाअभावी राज्यातील बहुतेक जिल्ह्यांमध्ये खरिपाच्या पेरण्या खोळंबल्या असून, सर्वदूर पावसासाठी आणखी काही दिवस वाट पाहावी लागणार असल्याने शेतकरी चिंतेत आहेत.

पावसाची हजेरी नाही

मोठ्या प्रतीक्षेनंतर जूनच्या शेवटी राज्याच्या बहुतांश भागांत मान्सूनच्या पावसाचे आगमन झाले. एक ते नऊ जुलै दरम्यान राज्याच्या सर्वच विभागांमध्ये सरासरी इतक्या किंवा त्यापेक्षा अधिक पावसाने हजेरी लावली. जुलैच्या पहिल्या नऊ दिवसांमध्ये कोकणात ६९ टक्के अधिक, मध्य महाराष्ट्रात २४ टक्के, मराठवाड्यात ६० टक्के, तर विदर्भात पाच टक्के जास्त पाऊस झाला. मात्र, बहुतांश जून महिना कोरडा गेल्याने कोकण वगळता राज्यातील बहुतांश जिल्ह्यांत एक जूनपासूनचे एकत्रित पर्जन्यमान सरासरीखालीच असल्याचे चित्र आहे.

सरासरीपेक्षा कमी

जालना, अकोला, हिंगोली आणि सांगली या जिल्ह्यांमध्ये आतापर्यंत सरासरीपेक्षा ६० टक्क्यांहून कमी पाऊस नोंदला गेला आहे. सरासरीपेक्षा २० ते ५९ टक्के कमी पाऊस झालेल्या जिल्ह्यांमध्ये पुण्यासह राज्यातील १९ जिल्ह्यांचा समावेश आहे. पालघरमध्ये सरासरीपेक्षा ३८ टक्के जास्त पाऊस झाला असून, ठाणे, रायगड, रत्नागिरी, सिंधुदुर्ग या कोकणातील, तर नंदुरबार, धुळे आणि नाशिक या उत्तर मध्य महाराष्ट्रातील जिल्ह्यांमध्ये सर्वसाधारण (सरासरीच्या १९ टक्के कमी-अधिक) पाऊस झाला आहे.

दमदार पाऊस नाहीच?

पेरणीयोग्य पाऊस न झाल्याने राज्यात बहुतेक ठिकाणी खरिपाच्या पेरण्या खोळंबल्या असून, तीन जुलैपर्यंत राज्यात एकूण खरीप क्षेत्रापैकी फक्त १४.४५ टक्के क्षेत्रावर पेरणी झाली होती. गेल्या वर्षी याच काळात पेरणी झालेल्या क्षेत्राच्या फक्त २९ टक्के ही पेरणी आहे. पुढील काही दिवस राज्यात दमदार पावसाची शक्यता नसल्याने शेतकऱ्यांमध्ये चिंतेचे वातावरण आहे.

‘पर्यायी उपाययोजनेसाठी तयार राहावे’

राज्यातील पर्जन्यमानाबाबत भारतीय हवामानशास्त्र विभागाच्या (आयएमडी) क्लायमेट रिसर्च अँड सर्व्हिसेसचे प्रमुख डॉ. कृष्णानंद होसाळीकर म्हणाले, ‘जुलैमध्ये आतापर्यंत राज्यात सर्वच विभागांमध्ये चांगला पाऊस झाला. मात्र, जूनमधील पावसाची तूट मोठी असल्याने राज्याच्या बहुतांश जिल्ह्यांतील एकूण पर्जन्यमान सरासरीखाली आहे. सध्या राज्यात बहुतेक ठिकाणी पाऊस सक्रिय नसून, पुढील काही दिवसांत मोठ्या पावसाची शक्यता नाही. राज्यात अनेक ठिकाणी पेरणीयोग्य पाऊस न झाल्याने खरिपाच्या वेळापत्रकावर त्याचा परिणाम होत आहे. येत्या काही दिवसांत मोठा पाऊस न झाल्यास कृषी विभागाला पर्यायी उपाययोजनेसाठी पावले उचलावी लागतील.’

Leave a Comment

Your email address will not be published. Required fields are marked *

Scroll to Top